IXTI Amerikani o‘rganish markazining yangi tahliliy hujjatida AQSH, Rossiya va Eron tashqi siyosat yo‘nalishlari o‘rtasida Xitoyni Janubiy Kavkaz va Markaziy Osiyo orqali Yevropa bilan bog‘laydigan O‘rta transport yo‘lining asosiy bo‘g‘ini hisoblangan Zangezur yo‘lagi taqdiri atrofida kuchayib borayotgan raqobat tahlil qilingan. Mualliflar ta’kidlashicha, Zangezur yo‘lagi shunchaki infratuzilma loyihasi emas, balki mintaqada ta’sirni geoiqtisodiy qayta taqsimlash vositasi bo‘lib, suverenitet, xavfsizlik va uzoq muddatli mintaqaviy tuzilma masalalarini keskinlashtirmoqda.
Hisobotda AQShning Armanistonning janubiy qismi orqali o‘tadigan yo‘nalishni 100 yil muddatga ijaraga olish va operatsion nazoratni neytral kafolat beruvchi sifatida faoliyat yuritadigan xususiy kompaniyaga topshirish taklifiga alohida e’tibor qaratilgan. Bu tashabbus bir vaqtning o‘zida Ozarbayjonning Naxchivanga va undan Turkiyaga barqaror tranzitini ta’minlashga, Armanistonning esa rasmiy suverenitetini saqlab qolishga qaratilgan. Tadqiqotda ta’kidlanishicha, bunday qaror mintaqadagi kuchlar muvozanatini o‘zgartirishi, Rossiya va Eronning ta’sir vositalarini zaiflashtirishi, shu bilan birga Markaziy Osiyo mamlakatlariga - ayniqsa Qozog‘iston va O‘zbekistonga Rossiya va Eron yo‘nalishlarini chetlab o‘tib, Yevropa bozorlariga to‘g‘ridan-to‘g‘ri chiqish imkoniyatini berishi mumkin.
Shu bilan birga, mualliflar ko‘plab to‘siqlarni xolisona baholaganlar. Armanistonda yo‘lakni ijaraga berish Syunik strategik mintaqasi ustidan nazoratni yo‘qotish xavfi sifatida qabul qilinmoqda. Ichki siyosiy beqarorlik, muxolifatning bosimi va yirik davlatlarga nisbatan tarixiy ishonchsizlik muzokaralarning barbod bo‘lishi uchun jiddiy xavf tug‘dirmoqda. Rossiya va Eron, o‘z navbatida, loyihaning amalga oshirilishini o‘zlarining geoiqtisodiy manfaatlariga putur yetkazish deb bilmoqda: Moskva Armanistonga energiya yetkazib berishni cheklashi va muqobil yo‘nalishlar ustidan nazoratni kuchaytirishi mumkin, Tehron esa allaqachon Ozarbayjon chegarasi yaqinida ochiqdan-ochiq harbiy faollik ko‘rsatmoqda va mintaqada izolyatsiyaga oid ritorikani kuchaytirmoqda.
Hujjatda Zangezur yo‘lagi uch raqobatdosh davlat strategiyalarining kesishish nuqtasiga aylanayotgani va uni amalga oshirish nafaqat diplomatik moslashuvchanlikni, balki mintaqaviy xavfsizlikning ishonchli mexanizmlarini yaratishni ham talab qilishi haqida xulosa chiqarilgan. Mualliflarning fikricha, loyihaning muvaffaqiyati iqtisodiy hamkorlikning institutlashgan shakllari orqali uzoq muddatli mojarolarni hal qilish uchun namuna bo‘lishi mumkin. Biroq, muvaffaqiyatsizlikka uchragan taqdirda, yo‘lak Janubiy Kavkaz ziddiyatlarining murakkab tizimida yana bir muzlatilgan keskinlik chizig‘iga aylanish xavfi mavjud.
* Istiqbolli xalqaro tadqiqotlar instituti (IXTI) hech qanday masalada muassasaviy nuqtai nazarni bildirmaydi; bu yerda keltirilgan fikrlar faqatgina muallif yoki mualliflarga tegishli bo‘lib, ular IXTIning qarashlarini aks ettirmaydi.
