Joriy yilning 1-7-avgust kunlari Xitoy Xalq Respublikasining O‘zbekiston Respublikasidagi elchixonasi taklifiga binoan davlat va akademik tuzilmalar vakillari, jumladan, Istiqbolli xalqaro tadqiqotlar instituti (IXTI) xodimlaridan iborat delegatsiya XXR Shinjon-Uyg‘ur muxtor hududiga tashrif buyurdi. Safar mintaqaning ijtimoiy-iqtisodiy rivojlanishi, millatlararo munosabatlari va Shinjonning madaniy merosi bilan yaqindan tanishish maqsadida matbuot turi shaklida uyushtirildi.
Dasturda madaniy-tarixiy obyektlarga alohida e’tibor qaratildi. Delegatsiya a’zolari mintaqaning boy tarixiy va etnografik merosini aks ettiruvchi Shinjon muzeyini ziyorat qilishdi, shuningdek, arxeologik yodgorliklar, jumladan, YUNESKOning Butunjahon merosi ro‘yxatiga kiritilgan Turfondagi qadimiy Jiaohe shahri xarobalari bilan tanishdilar. Safar davomida ishtirokchilar, shuningdek, noyob yer osti suv ta’minoti tizimi – karizlar, Turfonning uzumchilik an’analari, Tuyugou Maja qishlog‘ining hunarmandchilik merosi va Shinjon xalqlarining rang-barangligini saqlashga qaratilgan zamonaviy etnomadaniy loyihalar bilan tanishish imkoniga ega bo‘ldilar.
Tashrif chog‘ida delegatsiya bir qator muhim infratuzilma obyektlarini, jumladan, Urumchi xalqaro quruq portini va Xitoy-Qozog‘iston chegarasidagi Alashankou terminalini ham ko‘zdan kechirdi. Xitoy tomoni vakillari mintaqaning transport-logistika salohiyati, jumladan, multimodal markazlar, kompleks bojxona hududlari, xalqaro savdo maydonlari va ixtisoslashtirilgan ishlab chiqarish klasterlarini rivojlantirish bo‘yicha ma’lumot taqdim etdilar. 2024-yilning birinchi yarmida sezilarli o‘sishni qayd etgan SUAR tashqi savdosi dinamikasiga, shuningdek, “Bir makon, bir yo‘l” tashabbusi doirasida transport yo‘nalishlarini kengaytirishga alohida e’tibor qaratildi.
Xitoy tomoni Markaziy Osiyo bilan aloqalarni rivojlantirishning muhim elementi va savdo-iqtisodiy yo‘nalishlarni xilma-xillashtirish vositasi sifatida belgilagan Xitoy-Qirg‘iziston-O‘zbekiston temir yo‘l magistrali loyihasi alohida muhokama qilindi. Shuningdek, hududlararo hamkorlikni mustahkamlash, shu jumladan qardoshlashgan shaharlar o‘rtasidagi aloqalarni rivojlantirish istiqbollari ham ko‘rib chiqildi.
Tashrif axborot almashish va aloqalarni mustahkamlashga xizmat qildi, shuningdek, Shinjonni iqtisodiy va infratuzilmaviy rivojlantirishning joriy yo‘nalishlari, uning xalqaro transport yo‘laklari va tashqi iqtisodiy aloqalardagi o‘rni bilan tanishish imkonini berdi.
