Jahon iqtisodiyoti va diplomatiya universiteti (JIDU) huzuridagi Istiqbolli xalqaro tadqiqotlar instituti (IXTI) Buyuk Britaniyaning Toshkentdagi elchixonasi bilan hamkorlikda 2026-yil 26–27-mart kunlari Toshkent shahrida “Markaziy Osiyoda terrorizm va radikallashuvga qarshi kurash” mavzusida xalqaro anjuman o‘tkazdi. Tadbir zo‘ravon ekstremizm, onlayn radikallashuv va terrorchilik targ‘ibotining tobora kuchayib borayotgan muammolariga bag‘ishlandi. Unda dalillarga asoslangan chora-tadbirlar, mintaqaviy hamkorlik, strategik kommunikatsiyalar hamda ekstremistik g‘oyalarga qarshi immunitetni shakllantirish masalalariga alohida e’tibor qaratildi.

Anjumanda Markaziy Osiyo mamlakatlarining ixtisoslashgan davlat idoralari vakillari, diplomatlar, xalqaro va mintaqaviy ekspertlar hamjamiyati, shuningdek, terrorizmga qarshi kurashish, zo‘ravon ekstremizmning oldini olish va shu kabi masalalar bilan shug‘ullanuvchi xalqaro tashkilotlar, NNTlar va boshqa muassasalar amaliyotchi xodimlari ishtirok etdi. Tadbir umumiy mintaqaviy muammolarni muhokama qilish, amaliy tajriba almashish hamda ham oflayn, ham raqamli muhitda radikallashuvga barham berish bo‘yicha siyosatga yo‘naltirilgan yondashuvlarni o‘rganish uchun platforma vazifasini o‘tadi.

Anjumanni Oliy Majlis Senati Raisining birinchi o‘rinbosari va JIDU rektori Sodiq Safoyev, O‘zbekiston Respublikasi Tashqi ishlar vazirligi departament boshlig‘i Djaxongir Irgashev hamda Buyuk Britaniyaning O‘zbekiston Respublikasidagi elchisi Timoti Smart ochib berdi. Ochilish marosimini JIDU birinchi prorektori, IXTI direktori Akram Umarov olib bordi. Notiqlar o‘z nutqlarida mintaqadagi terrorchilik tahdidlarining o‘zgaruvchan tabiatiga munosib javob qaytarishda yaqinroq xalqaro hamkorlik va ko‘p tomonlama muloqotning ahamiyatini alohida ta’kidladilar.

Anjumanning birinchi kuni Markaziy Osiyodagi terrorchilik tahdidining hozirgi holati, ekstremistik targ‘ibotni yoyishda internetning o‘rni, radikallashuvning tub sabablari hamda ekstremistlar safiga yollashning ijtimoiy va gender jihatlariga bag‘ishlandi. Muhokamalarda terrorizmning xavfsizlikka oid jihatlari bilan bir qatorda, jamiyatlarni radikallashuvga moyil qiladigan kengroq ijtimoiy omillar ham ko‘rib chiqildi.

Ikkinchi kun zo‘ravon ekstremizmning oldini olish va onlayn ekstremistik targ‘ibotga qarshi kurashishning amaliy yondashuvlariga qaratildi. Fikr almashinuvlar davomida ekstremistik xabarlar ta’sirini kamaytirish uchun mahallalar darajasida profilaktik ishlarni olib borish, jamoatchilik bilan aloqalar strategiyalarini kuchaytirish hamda davlat idoralari, xalqaro hamkorlar va fuqarolik jamiyati vakillari o‘rtasidagi sa’y-harakatlarni yanada muvofiqlashtirish zarurligi qayd etildi.

Anjuman davomida ishtirokchilar Markaziy Osiyoda terrorizm va radikallashuvga qarshi kurashishning zamonaviy choralarini shakllantirishda xavfsizlik, boshqaruv, raqamli kommunikatsiya va ijtimoiy barqarorlikning o‘zaro bog‘liqligini tahlil qildilar. Tadbir mintaqadagi ekstremistik tahdidlarga qarshi kurashish bo‘yicha amaliy tavsiyalar va uzoq muddatli strategiyalarni ishlab chiqishda uzluksiz mintaqaviy muloqot va xalqaro hamkorlik muhim ekanini yana bir bor tasdiqladi.