16-may kuni Istiqbolli xalqaro tadqiqotlar instituti (IXTI) Serbiyaning Xalqaro siyosat va iqtisodiyot instituti bilan hamkorlikda ““Bir makon, bir yo‘l” (BMBY) tashabbusi doirasida Xitoy bilan hamkorlikda Serbiya va O‘zbekiston tajribasi” mavzusida xalqaro seminar tashkil etdi.

Tadbir Serbiya va O‘zbekistonning BMBY doirasida Xitoy bilan o‘zaro hamkorlikdagi qiyosiy tajribasini o‘rganish uchun har ikki tomondan va xorijdan olimlar hamda yosh tadqiqotchilarni jamladi. Seminar Xitoyning global infratuzilma va kommunikatsiyalarni rivojlantirish bo‘yicha yetakchi tashabbusi tufayli shakllangan murakkab geosiyosiy va iqtisodiy muhitda har ikki davlat qanday yo‘l tutayotgani haqida batafsil muhokamalar uchun maydon vazifasini o‘tadi.

Seminarda IXTIdan doktor Abbos Boboxonov, Hamza Boltayev va doktor Islomxon Gafarov hamda Institutning bir guruh ko‘ngillilari ishtirok etdi. Doktor Boboxonov o‘z ma’ruzasida Xitoy va Markaziy Osiyo o‘rtasidagi munosabatlarni chuqur tahlil qilib, strategik o‘zaro bog‘liqlik, energetika sohasidagi hamkorlik va mintaqadagi xavfsizlikning o‘zgaruvchan dinamikasi tobora muhim ahamiyat kasb etayotganini ta’kidladi.

Hamza Boltayevning ma’ruzasi tashabbusning kengroq maqsadlari va uning mintaqaviy rivojlanish hamda integratsiya uchun oqibatlariga bag‘ishlandi. U tashabbusning iqtisodiyotni modernizatsiya qilish va rivojlanayotgan mamlakatlarga infratuzilma investitsiyalarini jalb qilish vositasi sifatida xizmat qilishini, ammo shu bilan birga qarz barqarorligi va strategik qaramlik masalalarini ko‘tarishini ta’kidladi.

D-r Gafarov Serbiya va O‘zbekistonning Xitoy bilan hamkorligining parallel yo‘nalishlarini ko‘rib chiqib, infratuzilma, texnologiyalar va sanoatni rivojlantirish sohalarida umumiy manfaatlarga ega ekanligini qayd etdi. Shuningdek, u Serbiya, O‘zbekiston va Xitoy o‘rtasidagi uch tomonlama hamkorlikning bir qator istiqbolli yo‘nalishlarini, ayniqsa, transport, ta’lim va raqamlashtirish sohalarini ko‘rsatib o‘tdi.

Seminar ishtirokchilarning akademik hamkorlik va o‘zaro anglashuvni chuqurlashtirishga bo‘lgan katta qiziqishini aks ettiruvchi qizg‘in savol-javob sessiyasi bilan yakunlandi. Tadbir Serbiya va O‘zbekiston tadqiqot institutlari o‘rtasida OPOP kabi global rivojlanish tashabbuslari bo‘yicha muloqotni kengaytirish yo‘lidagi muhim qadam bo‘ldi.