2026-yil 7–11-sentyabr kunlari Barqaror rivojlanish markazi rahbari Saida Safayeva Boku iqlim harakatlari haftaligi – 2026 tadbirida ishtirok etdi. U o‘z nutqida O‘zbekistonning Orol dengizi inqirozining ekologik va ijtimoiy-iqtisodiy oqibatlarini bartaraf etish tajribasiga tayanib, Kaspiy mintaqasidagi iqlim barqarorligi masalalariga to‘xtaldi.

Saida Safayevaning ta’kidlashicha, suv sathining pasayishi nafaqat ekotizimlarga, balki aholi salomatligi, turmush darajasi va infratuzilmaga ham ta’sir ko‘rsatadigan jiddiy muammo sifatida qabul qilinishi kerak. U Orol va Kaspiy dengizlari o‘rtasidagi farqlarni e’tirof etgan holda, erta chora ko‘rish, birgalikda monitoring olib borish va mintaqaviy hamkorlikni kuchaytirishda Orol dengizi tajribasi dolzarb ekanligini qayd etdi.

O‘zbekiston, Qozog‘iston va Ozarbayjon o‘rtasidagi hamkorlik imkoniyatlariga alohida e’tibor qaratildi. SaidaSafayeva Barqaror rivojlanishning 17-maqsadi – “Maqsadlar yo‘lida hamkorlik”ka tayanib, ekologik ustuvorliklarni keng qamrovli rivojlanish maqsadlari bilan uyg‘unlashtirish uchun hukumatlar, tadqiqotchilar, xalqaro tashkilotlar, moliya institutlari va xususiy sektorni birlashtirish muhimligini ta’kidladi.

Shuningdek, uning nutqida ekologik barqarorlik va mintaqaviy bog‘liqlik, jumladan, O‘rta yo‘lak o‘rtasidagi o‘zaro aloqadorlik masalalari ham tahlil qilindi. U Kaspiy dengizining uzoq muddatli barqarorligi nafaqat qirg‘oqbo‘yi aholisi va ekotizimlari, balki savdo-sotiq, uzluksiz ta’minot zanjirlari hamda yashil va raqamli o‘tishni qo‘llab-quvvatlovchi materiallar tashuvlari uchun ham muhim ahamiyatga ega ekanligini alohida qayd etdi.